أعرف إزاي الفرق بين التعبير الخيالي والحقيقي ( دروس بلاغة )
كتير من حبايبنا بيجدوا صعوبة كبيرة في فرع البلاغة مع إن الموضوع غاية في السهولة وهنا في مدونتي قررت أساعدكم وكل مرة هوضح حاجه وهبدأ معاكم بالتعبير الخيالي والحقيقي
حبايبنا طلاب الثانوية
ركزوا معايا 3 دقائق بالعدد
لو كتبت ليك جملة
الجندي شجاع
وبعدها كتبت ليك
الجندي يفترس العدو
فيه جملة اسمها تعبير حقيقي مفيهوشش خيال ولا جمال ومباشر
هسألك فين منهم
هتقولي أكيد .. الجندي شجاع
ديه جملة حقيقية مفيهاش لا خيال
ولا جمال وكلنا متفقين على كده
عال العال الله ينور عليك
طيب جملة
الجندي يفترس العدو
هتقولي هو فيه جندي بيفترس
هقولك الله ينور ياوحش
هو ده التعبير الخيالي
باختصار تعبير عقلي وعقلك مش هيصدقه علشان فيه مانه بيمنع إن الجندي يفترس الافتراس ده بيكون للحيوانات المفترسة القوية
عال العال
يبقا الجندي شجاع ( تعبير حقيقي )
الجندي يفترس ( تعبير خيالي ، مجازي )
يلا نجرب تاني وربنا ديه لعبة زي الفل
الفتاة جميلة
الفتاة قمر
هتقولي التعبير الأول حقيقي والتاني خيالي لإنها فتاة حلوه أه بس مش قمر يعني فيه حاجه بتمنع إن الفتاة تكون قمر ده حتى القمر في السما والفتاة معانا أهي على الأرض
هقولك عال العال يبقا
الفتاة جميلة ( تعبير حقيقي )
الفتاة قمر ( تعبير خيالي مجازي )
وتقدر تجرب مليون مرة
البترول سعره مرتفع
الذهب الاسود سعره مرتفع
.............................
القمر يظهر بوضوح
القمر يبتسم
..................................................
وهختم درسي الأول ليك بمفاجأة حلوه
التعبير الخيالي هو ده اللي بمجرد ما هنشوفه هنمسك فيه بإيدينا وسنانا علشان ده هو الدرس التاني في البلاغة
التعبير الخيالي هيكون حاجه من دول
تشبيه - استعارة -- كناية - مجاز مرسل
تقولي أعرف ازاي أقولك روق ياجميل
ده درسنا التاني بإذن الله
مهمتك الوقت تجيب أي نص براحتك
وتطلعلي منه 5 تعبيرات خيالية وساعتها هقولك عاش الله ينور
ودرسنا اللي جي هيكون عن التشبيه يلا استعد
وإوعا وكمان إوعا تقول بعد النهاره البلاغة صعبة ولا إيييييه
السلام عليكم
تعليقات
إرسال تعليق