أسهل طريقة لحل مشكلة البلاغة / بلاغة ثانوية عامة2019/2020
إزاي أجيب التشبيه
درسنا التاني بعد لما عرفنا الفرق بين التعبير الحقيقي والتعبير الخيالي أو المجازي يلا بينا نطير على الدرس التاني
إتفقنا إننا لما هنلاقي تعبير خيالي هنعمل فيه إيه ؟؟
أيوه شاطر هنمسكه بإيدينا وسنانا
لإن التعبير الخيالي هيكون هو ده التعبير اللي بنسميه
لون بياني أو صورة بيانية
يبقا لما هيقابلني شاعر بيقول جوه قصيدته
(نطق الزمان )
هنقوله شكراً أوي هو ده التصوير البياني أو التصوير الخيالي أو المجازي اللي بيطلبه مننا نستخرجه من قطع البلاغة
طيب استخرجنا الصورة البيانية حلو الكلام
قولي حلو ياعم
وبعدين
لما هنجيب الصورة من الأبيات
أكيد هيقولي حدد صورة بيانية وبين نوعها
طيب محنا خلصنا من الأصعب وجيبنا الصورة البيانية زي الفل اهو
نوعها بقا أسهل بكتير من استخراجها
تخيل
عاوزك تحفظ معايا القاعدة ديه
الصورة البيانية هيكون نوعها حاجه من أربعة ملهمش خامس
أي صورة خيالية جبناها لما يقولي حدد نوعها هيكون نوعها واحد من دول
إما تشبيه
أو استعارة
أو كناية
أو مجاز مرسل
تقولي وهعرف إزاي هقولك ياعم صبرك بس
بص ياغالي
بعد لما بنجيب الصورة البيانية اللي هي خيالية زي ما اتفقنا
عاوزك بإيدك تشرحها
هتقولي هو أنا لسه هشرح هقولك اسمع بس مش هتندم
تعالى نكتب أي صورة بيانية خيالية مع بعض
الشاعر بيقول
فتعلموا فالعلم مفتاح العلا لم يبق باباً للسعادة مغلقا
تعرف تطلع من البيت ده صورة بيانية خيالية
هو صح وربنا صح ( العلم مفتاح ) طالما خيال يبقا صورة بيانية
إيه نوعها هقولك يلا نشرحها
شبه إيه العلم ( ده بنسميه مشبه ) بإنه إيه مفتاح ( ده بنسميه مشبه به )
يعني الطرفين قدامك ( أيوه ) المشبه موجود والمشبه به موجود ( والله أيوه ) يبقا عال العال ده مؤكد تشبيه
لإن التشبيه ده لون خيالي صورة خيالية يجب أن يتواجد بها الطرفان
( المشبه /والمشبه به )
هتقولي هو ينفع خيال يكون موجود ومفيهوش الطرفين
هقولك ينفع اوي بس ده مش درسنا
وعلشان متزعلش بص ياعم
الزمن ينطق مش ده خيال
تعرف تشرح ( شبه الزمان ده مشبه ) ( بإنه إنسان ده المشبه به ) إنت شايف المشبه به جوه الخيال
لأ يبقا ده مش تشبيه هيكون إيه
هيكون اكيد حاجه من اللي باقي يعني
استعارة / كناية / مجاز مرسل
وده مش درسنا النهارده
يبق الخلاصة
هنجيب الخيال
هنشرحه
هنشوف فيه الطرفين ( مشبه / ومشبه به ) هتقولي آه
هقولك مبروك جالك تشبيه
طبعا التشبيه احتمال يكون فيه أطراف تاني ( أداة تشبيه - وجه شبه ) بس ده مش وقته لسه جي في الطريق بإذن الله
يبقا بص معايا كده في الخيال ده
( القدس درة الشرق ) يلا ده خيال نشرح ( شبه القدس بأنها درة )ها الطرفين موجودين أيوه
مبرووك جالك تشبيه تاني
(قلبي شراع ) ده خيال قلتلي أيوه يلا نشرح ( شبه القلب بأنه شراع ) كمان مرة ده تشبيه
( الجندي كالأسد يقاتل عدوه ) قدامك خيال قلتلي آه
طب يلا اشرح
( شبه الجندي بأنه أسد ) الطرفين موجودين يبقا كمان تشبيه
يبقا النهارده عدينا على التشبيه
نستخرجه والمره اللي جايه بإذن الله
نعرف أركانه وكمان أنواعه
تقولي ولغاية المرة اللي جايه أقولك تقوم كده تستهدا بالله تشوف أي نص وتطلع منه أي خيال
ولو تشبيه يبقا عال العال
ولغاية المرة القادمة أقولك
السلام عليكم ورحمة الله وبركاته
تعليقات
إرسال تعليق