حل مشكلة الإعراب خطوة بخطوة

حل مشكلة الإعراب ( الخطوة الأولى )

خطوة بخطوة هتقدر تعرب 

لو مشكلتك المستمرة هي الإعراب
لو شايف إن الإعراب مشكلة ملهاش حل
ولو نفسك تعرب بطريقة صحيحة
يعني من الآخر لو الإعراب عندك مضاف إليه  دايماً  يبقا إنت في المكان الصحيح والدرس ده معمول ليك مخصوص
كل اللي هطلبه منك تركز معايا 3 دقايق بالعدد
قولي ركزت


طب يلا هبدأ معاك أول خطوة وديه البداية بعدها هكمل معاك واطمن مش هنحتاج أكتر من 4 خطوات بالعدد
النهارده يلا بينا عل أول خطوة هطلبها منك
أي كلمة هطلب منك إعرابها مش عاوزك غير تجيب بس بداية الجملة يعني ببساطة
مش هقولك مثلا إعرب كلمة  ( محمد ) وتقعد ساعة باصص في كلمة محمد وتقوله .. ها طب إيه
إيه إعرابك الله يسترك ..
مهو مش هينطق علشان يقول لحضرتك

الخطأ الكبير اللي بيقع فيه كتير من الناس إنه بيقعد باصص للكلمة ومركز فيها ويقولي يامستر مش هو اللي طالب مني إعرب هذه الكلمة
يبقا أبص عليها بقا
لا ياحبيبي ديه أول غلطه بنعملها لما بنعرب
مش عاوزك خالص تبص على الكلمة اللي طالب إعرابها
عاوزك بس تجيبلي بداية الجملة اللي فيها الكلمة ديه
علشان البداية هي اللي هتعرفك كل حاجه
يبقا القاعدة الأول ( سيبك خالص من الكلمة اللي مطلوب إعرابها وروح زي الشاطر هاتلي بداية الجملة اللي موجود فيها الكلمة اللي هنعربها )  قلتلي مااشي  نرجع بقا لكلمة ( محمد )
يبقا لما أقولك  بص معايا كده للجملة ديه

حرك  محمد السيارة  صباحاً وعاد متعباً

وهطلب منك إعرب كلمة  ( محمد )
متبصش كتير لكلمة محمد وروح هات بداية الجملة
تقولي سهلة بداية الجملة
حرك
هسألك حرك  ديه اسم ولا فعل
هتقولي فعل
هقولك عال يبقا أنا قدامي اسمها  جملة فعلية
والجملة الفعلية بتتركب من إيه

هتقولي ياه ديه بتاعت إبتدائي
( فعل -- فاعل - مفعول )

هقولك عال يبقا ينفع أقول مثلا في  إعراب محمد إنها خبر
هتقولي لا خلاص مينفعش  يبقا استبعدنا الخبر حلو الكلام ..

أقولك الله ينور يبقا محمد هتكون غالبا
حاجه من ال3 حاجات اللي قدمنا
لا هي الفعل  ( وطبعاً ده استحالة ) ( وإحنا عارفين الفعل ماضي ومضارع وأمر )
يبقى لو هو اللي قام بالفعل يعني فعل الحاجه يبقى هيكون الفاعل
مين اللي حرك السيارة ( محمد ) يبقا هو الفاعل
ونكمل الإعراب بقا وتكمل جميلك وساعتها هتقول فاعل مرفوع وسيب مرفوع وعلامة رفعه إيه المرة ديه لسه دوره مجاش

ولو هو اللي وقع عليه الفعل  مش اللي عمل الحاجه ديه ( هتبقى مفعول به وكمل جميك وقول
مفعول به منصوب وسيب علامة النصب لسه برضه مش النهارده
هي السيارة حركت نفسها ولا محمد اللي حركها


طيب نفس الكلمة ( محمد )  هيقولي إعربها
ومتفقين إننا مش هنبص على كلمة محمد هنبص على بداية الجملة اللي فيها الكلمة
فمثلا

الكتاب في يد محمد

هقولك إعرب كلمة محمد
هتقولي خلاص بقا منا فهمت اللي فيها
هبص على أول الجملة
طيب عال كمل
أول الجملة اسم ولا فعل
هتقولي اسم
هقولك الله ينور
ينفع بالله عليك أعرب محمد طالما الجملة اسمية
فعل   ولا فاعل  ولا مفعول
خلاص استحالة هتقولي طيب تبقا إيه  ؟؟؟؟؟!!
أقولك لا ده مش درسنا النهارده ياحبيبي   درسنا النهارده لو الكلمة جت في جملة فعلية
يبقا الكلمة ديه غالبا هتبقا
فعل أو فاعل أو مفعول
طبعا فيه حاجات بتيجي في الجملة الفعلية زيادة عن الحاجات التلاته اللي اتفقنا عليها
تقدر تقول ديه أصول الجملة الفعلية وليها زيادات كتير زي ( حال - مفعول مطلق - مفعول لأجله - ظرف ... وده كله هنجيبه بالترتيب بس  متفقين هنمشيها خطوة بخطوة   ..  مهمتك الوقت

الجمل اللي قدامك ديه كلها جمل فعليه
حدد بنفسك الأصول بتاعتها يعني الفعل والفاعل والمفعول وأي زيادة ملكش بيها خالص الوقت
وعادي خالص المفعول ييجي قبل الفاعل معندناش أي مشكلة
وبعديها استناني في الخطوة التانية قريب جداً بإذن الله يلا ابداً وبالتوفيق


كتب أخي الدرس بمهارة فائقة

انتصر المسلمون على المشركين في موقعة بدر
انتظم في الصباح الطلاب في صفوف جميلة

شرح المعلم للطلاب درساً شيقا
ظهر الهلال في سماء القاهرة

رأيت ورقة صغيرة في يد أخي

ولغاية الخطوة القادمة أستودعك الله
السلام عليكم ورحمة الله وبركاته